Operasie Een Ding

Die Evangelie vir die Hele Wêreld!

Jou Selfoon — God se Instrument!

deur
Elmer Grobler

Dit is vir ’n mens maklik om God se hand in die natuur te sien. Wanneer ‘n mens daar in die berge of op ‘n wildsplaas is, of oor die diep blou see kyk op ‘n pragtige sonskyn dag, of na die sterrehemel kyk op ‘n helder somersaand, kan mens nie anders as om bewus te word van die wonder van God se skepping nie! Ek was onlangs hoog daar in die Waterberge in die Marakele Wildreservaat en kon nie anders as om bewus te word van die grootheid van God nie. Maar kan ek jou ‘n vraag vra, sien jy as Christen God se hand ook in die geskiedenis, die politiek, die ekonomie, en … die tegnologie?

Jy sal agterkom dat ek baie skryf oor God se skeppingsdoel en God se doel en plan met die mens, die Kerk, en jou en my persoonlik. Die rede daarvoor is omdat ek God se hand begin raaksien het in die wêreld rondom my. Ek wil graag jou aandag vandag vestig op ‘n ander ding waarin jy dalk nog nooit God se hand gesien het nie — jou selfoon! Het jy al God se hand in jou selfoon raakgesien?

God se doel met jou selfoon ...

Jou selfoon is ‘n onmisbare instrument in jou daaglikse lewe. As jy jou selfoon by die huis vergeet het, voel dit vir jou asof jy vergeet het om jou broek aan te trek — jy voel kwesbaar. Ons neem meeste dinge in ons lewe so vanselfsprekend, maar besef ons dat God met elke ding in ons lewe ‘n doel het — ‘n ewigheidsdoel het — ‘n hemelse doel het!

Weet jy dat God ‘n baie belangrike doel met jou selfoon het? Jou selfoon is in die eerste plek God se instrument om die wêreld met die Evangelie te bereik. Laat ek die prentjie vir jou probeer helder skilder. Die tegnologiese revolusie van ons tyd en die ontwikkeling van die digitale tegnologie is deur God bestem om die HELE wêreld met die Evangelie te bereik omdat die Bybelse eindtyd profesieë teen ‘n asemrowende spoed besig is om in vervulling te gaan, omdat die geskiedenis van die wêreld deur die vinger van God geskryf word, en ons op die drumpel staan van die wederkoms van Jesus Christus!

God gebruik mense ...

Laat ek vir jou een voorbeeld noem. In 2004 lê God Sy hand op ‘n jong Joodse universiteitstudent wat Hom nie eers ken nie (soos Kores van ouds) met die naam Mark Zuckerberg. Mark begin ‘n sosiale media projek in sy koshuiskamer saam met ‘n paar medestudente en loods ‘n digitale toepassing met die naam Facebook. Bietjie meer as tien jaar later is feitlik 40% van die HELE WÊRELD SE BEVOLKING op Facebook, met Indië, waar die wêreld se meeste onbereikte groepe geleë is, as die wêreld se grootste Facebook gebruiker! WhatsApp sowel as Instagram behoort ook reeds aan Facebook. Dit is egter nie al nie, Mark Zuckerberg is vandag een van die wêreld se tien rykste mense — en weet jy wat nog, God is besig om Mark Zuckerberg te gebruik om internet toegang na die HELE WÊRELD te bring met behulp van sateliet-tegnologie.

Op 1 September 2016, terwyl Mark Zuckerberg in Afrika besig is om aan Afrika-leiers te verduidelik hoe hy bekostigbare internet toegang na die onontwikkelde wêreld wil bring, is Satan hard besig om God se plan te probeer verongeluk en lees ons: “Frustration, questions after satellite bringing Africa internet blows up.” Lees gerus die storie hier. Gelukkig eindig die verhaal nie hier nie, want op 3 Januarie 2017 lees ek: “SpaceX plans return to flight after explosion.”  

Weet jy, die wonder van hierdie verhaal is dat die Here my begin belas het om vir Mark Zuckerberg se redding te bid. Dink net wat God kan doen deur een man wie se lewe ten volle aan Hom oorgegee is! Mark was tot nou toe ‘n verklaarde atieïs — maar God! God is besig met Mark Zuckerberg, want ek lees op 2 Januarie 2017, “Facebook CEO Zuckerberg: ‘Religion is important’.” Hoor net wat sê hy: “In response to a comment which said “But aren’t you an atheist,” Zuckerberg replied: “No. I was raised Jewish and then I went through a period where I questioned things, but now I believe religion is very important.” Liewe Christenvriend, ek doen ‘n beroep op jou om saam met my te bid vir Mark Zuckerberg se redding.

‘n Laaste stukkie digitale nuus. Weet jy dat 68% van die wêreldbevolking reeds selfoongebruikers is — meer as die hoeveelheid mense wat toegang tot ‘n toilet het.

Is jou selfoon in diens van Jesus Christus?

Jy kan vandag (Januarie 2017) jou Bybel lees op jou selfoon in enige van 1,068 tale. In Augustus 2018 staan die getal reeds op 1,221. As jy nog nie YouVersion op jou selfoon het nie, laai dit gerus af vanaf Google Store. Dit is gratis. Jy kan ook na die Jesus-film op jou selfoon kyk in enige van 1,400 tale. (Aug 2018 - 1600 tale!) Jy kan preke, boodskappe en geestelike internet webblaaie lees op jou selfoon. Jy kan na Christelike radiostasies luister op jou selfoon. Jy kan na Christelike videos en TV kyk op jou selfoon.

Die groot vraag is egter, is jou selfoon in diens van Jesus Christus? Gebruik jy jou selfoon om God se doel en plan vir jou lewe te leef? Of is jou selfoon hoofsaaklik in jou eie diens? Dan is jy besig om God se doel en plan vir jou lewe mis te leef! Gaan jy hierdie boodskap net vir jouself hou, of gaan jy dit na jou vriende en kontakte stuur deur jou digitale media? Gebruik jy jou selfoon doelgerig om Jesus se Groot Opdrag uit te voer en die wêreld met die Evangelie te bereik? Indien nie, is jy besig om God se plan en doel vir jou lewe te mis!

Wil jy deur God gebruik word?

Die groot vraag is, is jou lewe in diens van God? Wil jy soos Mark Zuckerberg ‘n instrument in die hand van God wees? Laat ek iets aan jou verduidelik, Mark Zuckerberg is ‘n instrument in diens van God sonder dat hy dit weet — maar hy het sy beloning hier op aarde weg (tensy hy tot redding kom). Die Here het ‘n spesiale taak en roeping vir elkeen van Sy kinders — maar ons beloning kom eers in die hemel. Jou taak gaan miskien nie so glansryk, beroemd en voorspoedig vertoon soos Mark Zuckerberg s’n nie, maar wanneer Jesus weer kom — en dit is binnekort — sal jou beloning Mark Zuckerberg s’n by verre oortref! Al is jou taak net om ‘n paar knoppies op ‘n selfoon te druk!

Die groot vraag is, is jou lewe tot God se beskikking? Is jy ten volle aan God se doel en plan vir jou lewe oorgegee? Of leef jy primêr vir jouself en jou en jou gesin se gerief en plesier? Die Verlosser kom binnekort as die Regter — en Hy sal elkeen se werk beoordeel! “Elkeen se werk sal aan die lig kom, want die dag sal dit aanwys, omdat dit deur vuur openbaar gemaak word; en die vuur sal elkeen se werk op die proef stel, hoedanig dit is.” 1 Kor 3:13 (OV). 

Wil jy graag weet hoe om jou Goddelike doel en roeping te vind en ‘n instrument in die hand van God te wees? Volg hierdie skakel — maar deel eers hierdie artikel met jou vriende op die knoppies hieronder.

Die Skrywer
Deel asseblief hierdie artikel met jou vriende op jou sosiale media

Stel bekend

Missie Oorwin
Ons nooi jou saam op 'n oorwinningstog na die mins-geëvangeliseerde en onbereikte wêreld om 1 biljoen mense in hierdie wêrelddeel met die Evangelie te bereik. Lees meer van hierdie uitdagende en opwindende projek.

Artikels

| Tuisblad | Joernaal |
| Missie Oorwin |
| Visie 1 Biljoen | Visie 1 Persent |
| Omtrent Ons | Kontak |
| Jou Privaatheid | Ons Aanspreekliheid |

© Kopiereg 2016-18 Operasie Een Ding.
Alle regte voorbehou.